Maslinovo ulje prodajem - Iskrica Weblog

Nu!

Nu iša ja nikidan doli u'grad nebili štagod uja proda,
prićulija clo jutro ka ćuko doli na podan pazara ma njanka litricu da san proda,
a štas nema svit šoldi, i onda kuću diću ma kažen ja sam sebi ajd ti lipo moj Jarče malo rastegni noge pa lipo prošetaj doli po Bačvican doli gospoda i elita živi pa ti lipo od vrata do vrat kucaj i pitaj pa more bit da će ko od gospode i kupit, e.
Pozvonin ja na vrata od jedne kuće kad čovik otvorija,
ma ni čovik neg niki zalizan e,
ja lipo rečen da uje prodajen, a un meni da on ne troši to seljačko uje da un kupuje u finin dućanin i to samo ono extra divičansko,
unda ja njega pita da počemu on zna da je uje divičansko,
a un meni kaže da on to zna po mirisu i da un ima istančan fini nos,
unda ja njemu reka da mi može pomirisat gujicu pa neka mi onda reče jesan li ja divac oli nisan, e.
Unda on reka meni da san brezobrazna seljačina i da iđen ća oli će pustit pasa na'me,
unda ja njemu reka da pusti i mačka jerbo ću mu od pasa gulaš učinit, e kada se Jarac boji kakoga grackog ćuke e,
unda on pustija paščinu, ma śta paščinu, enti jarca ni to pas neg lav, tigar, veći o junca, zubine izkerija pa name, a ja brže boje biž, jedva san se škapula e,
i da znate oni Usain i ona nogata Blanka, ma oni su mala dica koliko ja mogu brzo šprintat i priskočit kad triba bižat za glavu spasit, e.
Taki san van ja i u gardi bija e, uvik prvi kad se povlačilo e.
Na'drugu kuću otvorila mi nika babetina i odma rekla da kako me ni sramota prosit,
unda ja njo reka da ja uje prodajen,
a ona meni da biću unda kakvi lopov oli manijak šta napada stare i same žene pa jin odnesu penzijicu i još in napastuju,
i da san grdan ka lopov,
onda ja njoj reka da je stara vištičetina i pogrdetina da samo misli na one stvari i da san ja pošten čovik da samo ulje prodajen i da je nebi šćapen taka e,
unda ona počela skričat zvat upomoć, zvat policiju i ona ja iša ća, e.
E a kad san ja pokuca na treća vrat, e tu me sunce ogrijalo, e.
Otvorila gospođa, nako u najlipšin godinan,
a lipa ma kada mi se Gospe o'cukra ukazala, pita me šta triban, ja jadan jedva promuca da uje prodajen jerbo san se odma zbunija, grlo mi se osušilo pa mi glas uša use,
a ona da jojo baš triba uje i pustila me unutra, e.
A judi moji koja lipota, nako ni basetna ni visoka, kosa ni bjonda ni nera, nego mezo,
gusta rudlava ki u one moje ovce šta je najbolja po vuni bila, a zubi bili, usta rumena, uf,
a tilo ajme, nase imala niku tanku veśticu, ona dobo stavjena a veśtica jon tisna, kratka,
ma sprida Mosor ozada Bijakova,
ma ni tako grubo brdovita nego nako lipo okruglo, osprida dva baluna od fuzbala ozada od košarke, e.
A ja bidan oči izdrečija ki mačak, možđani mi se zamutili, došlo mi vruće, sve me počelo srbit e,
a ona lipo me stavila sist, dala mi i rakiju za popit e, i da će ona uzest dvi litre uja ja joj reka da joj je to 200kn i ona unda donila jednu novčanicu od 500kn za platit, ja joj reka da neman za vratit joj kusur, a ona meni da netriban ja njoj ništa vraćat nego da ću joj ja zauzvrat ništo učinit, jebo da joj je muž nesposoban za oti posal, a da san ja čovik o'doka i da će to meni bit lako jerbo ona ni zahtjevna i netriba joj puno da ude zadovoljna e.
A ja odma skočija ma kakvi gospođo ja bi vas i mukte poluša i oti posa van učinija i učiniću sa guśton e. Onda ona rekla da iđe u sobu uredit prisvuć se i da je ja tu čekan, a ja odma skinija jaketu, košulju, nek odma gospoja vidi mišiće i rutave prsi e. Onda se gospoja pozvala u tu sobu tamo a ona obučena u niku trenerku i upoznala me sa mužen, i rekla da in je to teretana a da joj je muž lin za vježbat i da ona oće da ja sad malo vježban sa njima da pokažen joj mužu kako e dižu utezi,
a judi mojí meni planija živac odma san tija kaz i njoj i mužu śta se meni díže e, a jopet primuča san to jerbo ni lako danas nigdi zaradit 300kn e, pa san onda osta vježbat sa njima e.
Uf umorija san se ki jarac ti dan e.

MASLINOVO ULjE PRODAJEM, E!!!

Moj WebLog