Maslinovo ulje prodajem

Jučer se čula tužna vist po mistu,
govoridu pogini je čovik.

Ma ko je pogini, koji čovik?

Pogini je oni dobri čovik.

Ma koji dobri čovik je pogini?

Ma kako ne znaš, oni dobri čovik, ča je radi .....

A oti dobri čovik.


Je jučer se po mistu pronija glas sa je pogini čovik, svi su ga znali u mistu i okolnin mistin, i vaki dijalozi su se čuli i po kalan i po dvorin i po kafićin ma svugdi svugdi, i ja kad san zva da provirin jeli to istina, moja mi poznanica kaze.

A je, pogini je, zvala me jučer kuma i govori pogini je oni dobri čovik, ma koji čovik, ma oni dobri čovik .....
ma kaže nisan mogla virovat.

A je zna san ga, a nisan ga vidi ima sigurno priko trideset godin, a jeli mi ga ža je i ja ga pantin ka dobroga čovika.

Ali ni to ni bitno, bija je on i čovik od karijere, bome nije bija ni neimućan, i familija uredna ali eto sudbina mu taka i gotovo.

Eto ali je bitno, najbitnje, da ga ljudi nisu pripoznavali po tituli, po karijeri po imanju, nago su ga titulirali ka dobar čovik.

E neznan, neznan koja nagrada Nobelova i ova i ona, koja titula, dr, mr, sc, oc, mrsc, prsc, i koje imanje more nadmasit ovu titulu kad ljudi u tvomu mistu kad o takomu čoviku pricaju oni dobri čovik i to mu na kraju ta dobrota što je nosi u sebi postala drugo ime.

Bog ti da pokoj Dobri Čovik.